ທ່ານ ນາງ ຟລໍຣັອງສ ຊັອງບລັອງ-ຣີສແລກ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງສາທາລະນະລັດຝຣັ່ງ ປະຈຳ ສປປ ລາວ [fr]

ທ່ານ ນາງ ຟລໍຣັອງສ ຊັອງບລັອງ-ຣີສແລກ ມາດຳລົງຕຳແໜ່ງເປັນເອກອັກຄະລັດຖະທູດຝຣັ່ງ ປະຈຳ ສປປ ລາວ ໃນວັນທີ 11 ກັນຍາ 2018 ພາຍຫຼັງທີ່ເປັນທູດຝຣັ່ງ ປະຈຳ ນີວຊີແລນ, ເກາະ ຄຸກ (Cook Islands) ແລະ ຊາໂມອາ (Samoa) ນັບແຕ່ປີ 2015. ດ້ວຍປະສົບການສູງຫຼາຍກວ່າ 20 ປີ ທີ່ເຮັດວຽກກັບກະຊວງເສດຖະກິດ, ການເງິນ ແລະ ອຸດສາຫະກຳ, ທ່ານທູດໄດ້ພັດທະນາຄວາມຮູ້ ແລະ ເຂົ້າໃຈຢ່າງເລິກເຊິ່ງໃນຂະແໜງເສດຖະກິດ, ການແລກປ່ຽນດ້ານການຄ້າ ແລະ ວຽກງານສາກົນ.

ຊີວະປະຫວັດ

JPEG - 22.4 ko
Mme Florence Jeanblanc-Risler, Ambassadeur de France au Laos
MEAE/ Judith Litvine

ທ່ານ ນາງ ຟລໍຣັອງສ ຊັອງບລັອງ-ຣີສແລກ ເກີດ ວັນທີ 30 ພະຈິກ 1957 ທີ່ເມືອງແບນຟອກ, ຈົບການສຶກສາຈາກ ໂຮງຮຽນການປົກຄອງແຫ່ງຊາດ ແລະ ສະຖາບັນການສຶກສາການເມືອງ ນະຄອນຫຼວງປາຣີ ("Sciences Po"). ນອກຈາກນີ້, ທ່ານທູດຍັງຈົບປະລິນຍາໂທ ສາຂາພົວພັນສາກົນ ຈາກ ມະຫາວິທະຍາໄລໂຄລຳເບຍ ສະຫະລັດອາເມຣິກາ

ທ່ານທູດເລີ່ມເຮັດວຽກ ປີ 1984 ທີ່ນະຄອນຫຼວງປາຣີ ໃນຕຳແໜ່ງຫົວໜ້າຫ້ອງການສະໜອງທຶນການຂາຍ ກົມການບິນພົນລະເຮືອນ ກະຊວງຂົນສົ່ງ. ຫຼັງຈາກນັ້ນ, ກໍ່ເຂົ້າເຮັດວຽກ ທີ່ ອົງການການບິນພົນລະເຮືອນສາກົນ ເປັນໄລຍະເວລາ 3 ປີ, ຊຶ່ງເປັນອົງການສະເພາະດ້ານທີ່ຂຶ້ນກັບອົງການ ສປຊ ມີສຳນັກງານຕັ້ງຢູ່ ມົງເທຼອານ. ຢູ່ທີ່ນັ້ນ, ທ່ານທູດໄດ້ຮັບຕຳແໜ່ງເປັນຜູ້ຮັບຜິດຊອບພາລະກິດ ປະຈຳ ຫ້ອງການເລຂາທິການ ແລະ ຜູ້ກວດສອບ ປະຈຳຫ້ອງການກວດກາບັນຊີ. ນອກຈາກນີ້, ທ່ານທູດຍັງມີປະສົບການເຮັດວຽກໃນຂະແໜງເອກະຊົນ ຊື່ງເຄີຍໄດ້ເປັນຜູ້ຮັບຜິດຊອບພາລະກິດ ປະຈຳ ຜູ້ອຳນວຍການກຸ່ມບໍລິສັດຜະລິດຍົນເພື່ອການຂົນສົ່ງລະດັບພາກພື້ນ ທີ່ຮ່ວມລົງທຶນລະຫວ່າງ ຝຣັ່ງ ແລະ ອີຕາລີ (GIE aéronautique franco-italien ATR).
ປີ 1992, ທ່ານທູດໄດ້ເຂົ້າເຮັດວຽກຢູ່ ກະຊວງເສດຖະກິດ, ການເງິນ ແລະ ອຸດສາຫະກຳ ໂດຍມີການສະຫຼັບໝູນວຽນເຮັດໜ້າທີ່ປະຈຳຢູ່ປາຣີ ແລະ ຢູ່ຕ່າງປະເທດ, ໂດຍສະເພາະ ຢູ່ປະເທດຍີ່ປຸ່ນ, ສ.ອາເມຣິກາ ແລະ ການາດາ ຊຶ່ງທ່ານທູດຮັບຜິດຊອບຕິດຕາມເອກະສານການຄ້າສາກົນ ແລະ ວຽກງານໃນຂອບຫຼາຍຝ່າຍ ເຊັ່ນ GATT ແລະ ອົງການ WTO ໃນໄລຍະຮອບວຽນກອງປະຊຸມເຈລະຈາ ອູຣູກວຍ ແລະ ໂດຮາ (Uruguay & Doha Round). ທ່ານທູດຍັງໄດ້ຮັບຜິດຊອບວຽກງານ G20 ແລະ ວຽກງານເອີຣົບ.
ທ່ານທູດຍັງໄດ້ຮ່ວມມືຢ່າງຫ້າວຫັນກັບຂະແໜງເອກະຊົນ ໃນການສົ່ງເສີມການແລກປ່ຽນດ້ານການຄ້າ ແລະ ການລົງທຶນໃນປະເທດຝຣັ່ງ ແລະ ຕ່າງປະເທດ ລວມທັງໄລຍະການເຈລະຈາຂໍ້ຕົກລົງດ້ານການຄ້າເສລີ ເຊັ່ນ ຂໍ້ຕົກລົງດ້ານເສດຖະກິດ ແລະ ການຄ້າ (CETA) ລະຫວ່າງ ສະຫະພາບເອີຣົບ ແລະ ການາດາ ແລະ ຂໍ້ຕົກລົງການຮ່ວມມືດ້ານເສດຖະກິດ ລະຫວ່າງ ຍີ່ປຸ່ນ ແລະ ສະຫະພາບເອີຣົບ.
ປີ 1992 - 1995, ໃນນາມຫົວໜ້າຫ້ອງການແລກປ່ຽນການບໍລິການສາກົນ ກະຊວງເສດຖະກິດ, ການເງິນ ແລະ ອຸດສາຫະກຳ, ທ່ານທູດໄດ້ປະກອບສ່ວນຢ່າງຕັ້ງໜ້າໃນຮອບວຽນກອງປະຊຸມເຈລະຈາ ອູຣູກວຍ ຊຶ່ງໃນໄລຍະກອງປະຊຸມດັ່ງກ່າວ ປະເທດຝຣັ່ງ ໄດ້ຍົກເອົາຫຼັກການດ້ານວັດທະນະທຳທີ່ບໍ່ເຄີຍມີການກ່ອນ ຂຶ້ນມາປຶກສາຫາລື.

ໃນໄລຍະທີ່ປະເທດຝຣັ່ງເປັນປະທານ G20, ທ່ານ ນາງ ຟລໍຣັອງສ ຊັອງບລັອງ-ຣີສແລກ ໄດ້ຮັບໜ້າທີ່ ປະທານຮ່ວມໜ່ວຍງານ G20 ກ່ຽວກັບ ການຕ້ານ ແລະ ສະກັດກັ້ນການສໍ້ລາດບັງຫຼວງ 2009 - 2011.

ກ່ອນໄດ້ຮັບການແຕ່ງຕັ້ງ ເປັນທູດ ປະຈຳ ນີວຊີແລນ ໃນປີ 2015, ລະຫວ່າງ ປີ 2011 - 2015, ທ່ານ ນາງ ຟລໍຣັອງສ ຊັອງບລັອງ-ຣີສແລກ ເຄີຍເຮັດໜ້າທີ່ ເປັນທີ່ປຶກສາວຽກງານເສດຖະກິດ ທີ່ສະຖານທູດຝຣັ່ງ ປະຈຳ ໂຕກຽວ. ຊຶ່ງເຮັດໜ້າທີ່ຊີ້ນຳ ແລະ ປະສານງານ ການເຮັດວຽກຂອງບັນດາພະແນກເສດຖະກິດ ປະຈຳ ຍີ່ປຸ່ນ, ເກົາຫຼີ, ອົດສະຕຣາລີ ແລະ ນີວຊີແລນ. ປີ 2006 - 2009 ທ່ານທູດເຮັດໜ້າທີ່ດຽວກັນ ຢູ່ ສະຖານທູດຝຣັ່ງ ປະຈຳ ອົດຕະວາ ແລະ 2001 - 2006 ຢູ່ສຳນັກງານຜູ້ຕາງໜ້າຖາວອນປະເທດຝຣັ່ງ ປະຈຳ ສະຫະພາບເອີຣົບ. ນອກຈາກນີ້, ທ່ານທູດຍັງໄດ້ໄປປະຈຳໜ້າທີ່ 2 ປີ ຢູ່ ວໍຊີງຕັນ ແລະ 5 ປີ ຢູ່ສະຖານທູດຝຣັ່ງ ປະຈຳ ໂຕກຽວ ແຕ່ປີ 1995 - 1999.
ທ່ານທູດມີລູກທັງໝົດ 3 ຄົນ ຊື່ : ກາບຣີແອນ (25 ປີ), ຊາມູຍແອນ (28 ປີ) ແລະ ກະແລກ (31 ປີ). ທັງສາມຍັງສືບຕໍ່ເຮັດວຽກຢູ່ຕ່າງປະເທດ.
ທ່ານທູດໄດ້ຮັບການປະດັບຫຼຽນກາກຽດຕິຍົດສູງສຸດ, ຫຼຽນກຽດຕິຄຸນແຫ່ງຊາດ, ຫຼຽນກຽດຕິຄຸນສຳລັບຜູ້ທີ່ມີຜົນງານໃນການພັດທະນາກິດຈະການທາງທະເລ ແລະ ຫຼຽນກາດ້ານສິນລະປະ ແລະ ພາສາສາດ.

ປະສົບການດ້ານອາຊີບ

ນັບແຕ່ເດືອນກັນຍາ 2018 ຈົນເຖິງປະຈຸບັນ : ທູດຝຣັ່ງ ປະຈຳ ສາທາລະນະລັດ ປະຊາທິປະໄຕ ປະຊາຊົນລາວ

2015-2018 : ທູດຝຣັ່ງ ປະຈຳ ນີວຊີແລນ, ເກາະ ຊາໂມອາ (Samoa) ແລະ ເກາະ ຄຸກ (Cook Island) ຊຶ່ງມີສຳນັກງານຕັ້ງຢູ່ນະຄອນຫຼວງ ແວວລິງຕັນ (Wellington)

2011- 2015: ທີ່ປຶກສາວຽກງານດ້ານເສດຖະກິດ, ຫົວໜ້າພະແນກເສດຖະກິດລະດັບພາກພື້ນ
ສະຖານທູດຝຣັ່ງ ປະຈຳ ໂຕກຽວ, ປະເທດຍີ່ປຸ່ນ

2009- 2011: ເປັນທີ່ປຶກສາວຽກງານສາກົນໃຫ້ແກ່ຫົວໜ້າກົມຄັງເງິນ
ກະຊວງເສດຖະກິດ, ການເງິນ ແລະ ອຸດສາຫະກຳ ທີ່ ນະຄອນຫຼວງປາຣີ

2006 – 2009 : ທີ່ປຶກສາວຽກງານດ້ານເສດຖະກິດ
ຢູ່ສະຖານທູດຝຣັ່ງ ປະຈຳ ເມືອງຫຼວງອົດຕະວາ, ປະເທດການາດາ

2001 - 2006 : ທີ່ປຶກສາວຽກງານດ້ານເສດຖະກິດ
ຢູ່ສຳນັກງານຜູ້ຕາງໜ້າຖາວອນປະເທດຝຣັ່ງ ປະຈຳ ສະຫະພາບເອີຣົບ - ບຣຸກແຊນ

1999 - 2001 : ຮອງຫົວໜ້າພະແນກເສດຖະກິດ
ຢູ່ສະຖານທູດຝຣັ່ງ ປະຈຳ ວໍຊີງຕັນ, ສະຫະລັດອາເມຣິກາ

1995 - 1999 : ຮອງຫົວໜ້າພະແນກເສດຖະກິດ
ຢູ່ສະຖານທູດຝຣັ່ງ ປະຈຳ ໂຕກຽວ, ປະເທດຍີ່ປຸ່ນ

1992 - 1995 : ຫົວໜ້າຫ້ອງການແລກປ່ຽນດ້ານການບໍລິການສາກົນ
ກະຊວງເສດຖະກິດ, ການເງິນ ແລະ ອຸດສາຫະກຳ ທີ່ ນະຄອນຫຼວງປາຣີ

1989 - 1992 : ຮັບຜິດຊອບພາລະກິດ ປະຈຳ ຫ້ອງການເລຂາທິການ
ອົງການການບິນພົນລະເຮືອນສາກົນ ຢູ່ ມົງເທຼອານ ປະເທດການາດາ

1987 - 1989 : ຮັບຜິດຊອບພາລະກິດ ປະຈຳ ຜູ້ອຳນວຍການ ກຸ່ມບໍລິສັດຜະລິດຍົນເພື່ອການຂົນສົ່ງລະດັບພາກພື້ນ ທີ່ຮ່ວມລົງທຶນລະຫວ່າງ ຝຣັ່ງ ແລະ ອີຕາລີ (GIE franco-italien ATR (Avions de Transport Régional))
AEROSPATIALE - GIE ATR – Paris

1984 - 1987 : ຫົວໜ້າຫ້ອງການສະໜອງທຶນການຂາຍ
ກົມການບິນພົນລະເຮືອນ - ພະແນກໂຄງການການບິນພົນລະເຮືອນ - ປາຣີ

ການສຶກສາ
- ຈົບການສຶກສາຈາກສະຖາບັນການສຶກສາການເມືອງ ນະຄອນຫຼວງປາຣີ ("Sciences Po") – ປາຣີ
ຂະແໜງພົວພັນສາກົນ – 1975

- ຈົບການສຶກສາຈາກມະຫາວິທະຍາໄລ ໂຄລຳເບຍ (USC) – ສະຫະລັດອາເມຣິກາ
ປະລິນຍາໂທຂະແໜງພົວພັນສາກົນ – 1978

- ຈົບການສຶກສາຈາກໂຮງຮຽນການປົກຄອງແຫ່ງຊາດ - ENA
ຈົບລຸ້ນທ່ານ Louise Michel – ປາຣີ – 1984

CV

ວັນເດືອນປີເກີດ : ທີ 30 ພະຈິກ 1957 ທີ່ ເມືອງແບນຟອກ, ປະເທດຝຣັ່ງ
ມີລູກ 3 ຄົນ
- ໄດ້ຮັບການປະດັບຫຼຽນກາດ້ານສິນລະປະ ແລະ ພາສາສາດ - 21 ທັນວາ 1993
- ໄດ້ຮັບການປະດັບຫຼຽນກຽດຕິຄຸນແຫ່ງຊາດ - 10 ພະຈິກ 1998
- ໄດ້ຮັບການປະດັບຫຼຽນກຽດຕິຍົດສູງສຸດ - 31 ທັນວາ 2006
- ໄດ້ຮັບການປະດັບຫຼຽນກຽດຕິຄຸນສຳລັບຜູ້ມີຜົນງານໃນການພັດທະນາກິດຈະການທາງທະເລ - 23 ກໍລະກົດ 2018

CV ແລະ ຊີວະປະຫວັດຂອງທ່ານ ນາງ ຟລໍຣັອງສ ຊັອງບລັອງ-ຣີສແລກ ສະບັບພາສາອັງກິດ

PDF - 256 ko
ຊີວະປະຫວັດ ຂອງທ່ານ ນາງ ຟລໍຣັອງສ ຊັອງບລັອງ-ຣີສແລກ, ເອກອັກຄະລັດຖະທູດວິສາມັນຜູູ້ມີອ ານາດເຕັມແຫ່ງສາທາລະນະລັດຝຣັັ່ງ ປະຈ າ ສປປ ລາວ
(PDF - 256 ko)
PDF - 187.5 ko
CV ແລະ ຊີວະປະຫວັດຂອງທ່ານ ນາງ ຟລໍຣັອງສ ຊັອງບລັອງ-ຣີສແລກ ສະບັບພາສາອັງກິດ
(PDF - 187.5 ko)

ດັດແກ້ຄັ້ງຫຼ້າສຸດ 28/03/2019

ກັບໄປດ້ານເທິງ